![](/wp-content/uploads/2024/07/Screenshot_٢٠٢٤٠٧١٥_١٤٠٠٥٢_Facebook-1-490x470.jpg)
من وجع الجروف بتطل
تقاطيع وشك السمحه
وتبقي وسط ديارنا الضل
وفي الزمن اليباس قمحه
جرتق وفال عديله وزين
وفوق راس البنات طرحه
كفاف عامل هني وفرحان
ولي أهل الصلاح سبحه
بﻻقيك جوه في الاحلام
موسمه بالجرح والنار
شايله الضحكه رغم البيك
واقفه وساله سيف التار
محزمه شايله هم الحي
براكي وسط زمن غدار
تغني تغني ياحليلم
اخوان فاطنه كانو كتاااار
هسه منو البسند الضل
عشان نور الشمس مايميل
عشان ضي الصباح يشرق
يشق قلب الضلام والليل
منو الفي حضنو ببني ليك
مداين ودنيا شايله عديل
ويتحمل عشان عينيك
عذاب السكه جمر الويل
تقاطيعك بتشلع نور
تبرعم في الحجر احلام
تدوس الشوك عشان تلقاك
ننور ليك ضلام وضلام
نصحي جمر زمان الريد
نصحي مواجعو كان يوم نام
جذع نخلتنا عند القيف
بقيف ويقاوم الهدام
زكريا صالح محمد عطبراوي