عازه قشى دموع أساكى
ألعنى البطعن قفاكى
يالسلام وانتى ف علاكى
يا نموت نهلك فداكى
***
السلام ما معنا نصفح
وننسى كل الخان عهودك
لا نهادن لا نسامح
البفوت فى يوم حدودك
لا البيرضع من ثديكى
وبى جحود بيعضى ايدك
السلام أمن ومحبه
بسمه صافيه على خدودك
***
السلام ما بس كلام
بيهو نتشدق ننادى
فى المنابر وفى الجرايد
فى الميادين والروادى
السلام معنى وحقيقه
بيهو تتماسك أيادى
تصفى بى اسمو الضماير
لا نخاصم لا نعادى
السلام ما بكون حقيقه
الا لو صفت الضماير
لا فى أحقاد لا ضغاين
لا تفرقنا الصغاير
لا تربص لا توجس
فى وطن بى خيرو عامر
نملا أمن كمان محبه
تصفى بى اسمو السراير
البفوت الحد نقيفلو
نبقى نار نارو وسعيرو
من غضبنا ومن لهبنا
مافى زول يقدر يجيرو
والرضيع الفينا نحنا
مستعد يهزم كبيرو
والبمس دمورنا قطعا
نحنا بنقطع حريرو
عازه شيليها البنادق
ويلا نرجع للخنادق
وبى سلام بيدوس عرضنا
أصلو ما نقبل نوافق
يا نعيش كرما وأعزه
يانموت بى عزم صادق
نحنا مليون ميل محبه
نحنا موت لعدونا ماحق
