
الموت سمبله يا وزير الصحة
يقولون : تعددت الأسباب والموت واحد …
ونعم بالله كل حي ميت والي زول لكن بهذه الصورة الساذجة و الأكثر سذاجة واستهتار خاصة بروح البني آدم عندنا في السودان
ذهبت صباح اليوم السبت بابنائي الاثنين لمقابلة الطبيب لوعكة صحية المت بهم … ذهبت بالأول الي مستوصف العالم بالكلاكلة بالقرب من مستشفي التركي واذا بموظفة الاستقبال تخبرني ان الدكتور المعني يعمل بالمساء فقط …
طيب لحدي المساء انا اعمل شنو وهل هذا الطفل سيصبر حتي المساء…. هذه واحدة
ذهبت الي المستشفي التركي قلت خلاص دا مستشفي حكومي وبيكون منتظم … للأسف قابلني بتاع الباب بكل برود أن العمليات الصغيرة والكبيرة متوقفة منذ أربعة سنوات ….. طيب نمشي وين !!!
قلت خلاص اليومين دي المراكز الصحية احسن ذهبت لمركز صحي الكلاكلة القبة وهو يقع وسط شريحة كبيرة من المجتمع ويحتل مساحة كبيرة لماذا لا يحول الي مستشفي … ما علينا هو نافع يكون دكان …
المهم تحولت في كل اطرافه وجدت غرفة فااااااضية … واخري مغلقة ….. لكن ربي هداني ودلفت ناحية اليسار وجدت دكتورة ما شاء الله والحمد لله … لكن صف طوووووويل من البشر … رجعت قلت خلاص اشيل علاج من الصيدلية بتاع الصيدلية نهرني التقول شتمت ابوه … قال ما بتعامل الا بورقة من الدكاترة…. هو في دكاترة كلام غريب!!!!!
رجعت لي بتاعت الحسابات قلت ما ادفع لحدي ما اعرف الحاصل سألتها انت بتاع العمليات الصغيرة موجودة … بكل هدوء ودون النظر الي قالت ابدا وطبعا لا ….
اها يا اخوان بعد دا نمشي وين ؟
طبعا مقابر القبة أقرب…..
اعتقد يا وزير الصحة تصحوا شوية وتغلق هذه المؤسسات او تحولها الي زرائب بهائم افضل اليومين دي البهائم عندنا كتيرة مع الخريف دا …
ابو انس …..




