ثقافة وأدب

شعر هيفاء مهدي … ” لما تبقى القصة مُرّة “

لما تبقى القصة مُرّة
وتنجرح من تاني مرّة
وتشيل معاك ألم السنين
وتحس بالحزن الدفين
وتقول: خلاص العمر ضاع
في سكة مليانة تِياع
ضاعت معاه أفراح جميلة ملوّنة
ممزوجة بي شوق وأماني مطمّنة

فكرت أهرب من لقاك
ما قدرت أتخيل أعيش من غير هواك

وبعد الحصل…
جمّعت أحزاني ومشيت
في سكة مليانة بخطر
ما أظني أرجع تاني ليك
لو كنت لي آخر البشر

ارحل خلاص من سكتي
انسى الرجوع لي قصتي
قصة ألم ما أظن تعود
من تاني لي قلبي الحزين

في دنيتي ما عرفت غير طعم الأنين
حتى الفرح بقى لي بعيد بعد النجوم
وجروحي العميقة ما أظن أنساها يوم

وأنت في بعادك ما بتسأل
عن قلب حباك بجد
أصلو في هواك كان متيم
من يوم ما اتوجد

وتبقى كل القصة بينا
قصة للريدة الأليمة
وكل حياتي الكنت فيها
حياة ما ليها قيمة.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى